அன்னா இயோ

மாண்புமிகு அன்னா இயோ Hannah Yeoh MP
அன்னா இயோ
மலேசிய இளைஞர் விளையாட்டுத்துறை அமைச்சர்
பதவியில் உள்ளார்
பதவியில் 3 டிசம்பர் 2022
ஆட்சியாளர்	சுல்தான் அப்துல்லா
பிரதமர்	அன்வார் இப்ராகிம்
முன்னையவர்	அகமத் பைசல் அசுமு
தொகுதி	சிகாம்புட்
பெண்கள், குடும்பம் மற்றும் சமூக மேம்பாட்டு துணை அமைச்சர்
பதவியில் 2 சூலை 2018 – 24 பிப்ரவரி 2020
10-ஆவது சிலாங்கூர் மாநில சட்டமன்ற சபாநாயகர்
பதவியில் 21 சூன் 2013 – 9 ஏப்ரல் 2018
தேசிய ஊடக உதவிச் செயலாளர் ஜனநாயக செயல் கட்சி
பதவியில் உள்ளார்
பதவியில் 20 மார்ச் 2022
சிகாம்புட் மக்களவைத் தொகுதி
பதவியில் உள்ளார்
பதவியில் 9 மே 2018
பெரும்பான்மை	59,684 (2022) 45,702 (2018)
சுபாங் ஜெயா சட்டமன்றத் தொகுதி
பதவியில் 8 மார்ச் 2008 – 9 மே 2018
பெரும்பான்மை	28,069 (2013) 13,851 (2008)
தனிப்பட்ட விவரங்கள்
பிறப்பு	அன்னா இயோ சியோவ் சுவான் 9 சனவரி 1979 (1979-01-09) சுபாங் ஜெயா; மலேசியா
அரசியல் கட்சி	ஜனநாயக செயல் கட்சி (DAP)
பிற அரசியல் தொடர்புகள்	பாக்காத்தான் ராக்யாட் (PR) (–2015) பாக்காத்தான் அரப்பான் (PH) (2015 முதல்)
துணைவர்	ராமச்சந்திரன் முனியாண்டி (தி. 2008)
பிள்ளைகள்	2
முன்னாள் கல்லூரி	தாஸ்மானியா பல்கலைக்கழகம்
வேலை	அரசியல்வாதி
தொழில்	வழக்கறிஞர்
இணையத்தளம்	www.hannahyeoh.com

2013-ஆம் ஆண்டு பெட்டாலிங் ஜெயாவில் ஹன்னா இயோ

ஹன்னா இயோ (மலாய்: Hannah Yeoh; ஆங்கிலம்: Hannah Yeoh Tseow Suan; சீனம்: 杨巧双); (பிறப்பு: சனவரி 9 1979); என்பவர் ஒரு மலேசிய அரசியல்வாதி ஆவார். 2022 டிசம்பர் 3-ஆம் தேதி முதல் மலேசிய அமைச்சரவையில் மலேசிய இளைஞர் விளையாட்டுத்துறை அமைச்சராகப் (Minister of Youth and Sports) பொறுப்பு ஏற்றுள்ளார்.

முன்னதாக, இவர் முன்னாள் பிரதமர் மகாதீர் பின் முகமது; மற்றும் முன்னாள் துணைப் பிரதமர் வான் அசிசா வான் இஸ்மாயில்; ஆகியோரின் கீழ் பாக்காத்தான் அரப்பான் (PH) நிர்வாகத்தில் பெண்கள், குடும்பம் மற்றும் சமூக மேம்பாட்டு துணை அமைச்சராக (Deputy Minister of Women, Family and Community Development) சூலை 2018 முதல் பிப்ரவரி 2020 வரை பணியாற்றினார்.

மலேசியாவின் முதல் பெண் சட்டமன்றத் தலைவர்; மற்றும் 34 வயதில் மலேசியாவின் மிக இளைய வயது சட்டமன்றத் தலைவர் எனும் சாதனையையும் படைத்து உள்ளார்.

பொது

இவர் சூன் 2013 முதல் ஏப்ரல் 2018 வரை சிலாங்கூர் மாநில சட்ட மன்றத்தின் 10-ஆவது சபாநாயகராகவும் (Speaker of the Selangor State Legislative Assembly), மார்ச் 2008 முதல் மே 2018 வரை சுபாங் ஜெயாவின் சிலாங்கூர் மாநில சட்டமன்ற உறுப்பினராகவும் (MLA) பணியாற்றினார்.

அவர் பாக்காத்தான் அரப்பான் தலைமையிலான ஒற்றுமை அரசாங்கக் கூட்டணியின் ஓர் அங்கமான ஜனநாயக செயல் கட்சியின் (DAP) உறுப்பினரும் ஆவார். மார்ச் 2022 முதல் ஜசெகவின் உதவி தேசிய விளம்பரச் செயலாளராகவும் பணியாற்றி உள்ளார்.

பின்னணி

அன்னா இயோ, சுபாங் ஜெயாவில் (Subang Jaya) பிறந்தவர். சுபாங் ஜெயா தொடக்கப்பள்ளி, சுபாங் உத்தாமா இடைநிலைப் பள்ளியில் (SMK Subang Utama) படித்தவர். அதன் பிறகு ஆஸ்திரேலியாவில் உள்ள தாஸ்மானியா பல்கலைக்கழகத்தில் (University of Tasmania) தன் படிப்பைத் தொடர்ந்தார்.

சட்டப் படிப்பை முடித்ததும்; 2001-ஆம் ஆண்டில் மலேசியாவில் வழக்கறிஞராக (Malaysian Bar) அங்கீகரிக்கப் பட்டார். சனவரி 2003-இல் தாஸ்மேனியாவில் வழக்கறிஞருக்கான சட்டப்பூர்வ நடைமுறைச் சான்றிதழைப் பெற்றார். அதன் பிறகு தாஸ்மேனியாவின் உச்ச நீதிமன்றத்தில் (Supreme Court of Tasmania) அனுமதிக்கப்பட்டார்.

2006-இல் ஒரு தனியார் நிறுவனத்தில் வேலை செயவதற்கு முன், பெட்டாலிங் ஜெயாவில் மூன்று ஆண்டுகள் வழக்கறிஞராகப் பணியாற்றினார்.

அரசியல் வாழ்க்கை

மலேசிய உள்நாட்டுப் பாதுகாப்புச் சட்டம்

இவரின் பள்ளித் தோழரான எட்வர்ட் லிங் (Edward Ling) என்பரால் அரசியல் உலகிற்குள் ஈர்க்கப்பட்டார். இருவரும் 2006-ஆம் ஆண்டின் பிற்பகுதியில் ஜனநாயக செயல் கட்சியின் டாமன்சாரா கிளையில் சேர்ந்தனர். ஜனநாயக செயல் கட்சி ஓர் எதிர்க்கட்சியாக இருந்தாலும் அதில் சேர அன்னா இயோ முடிவு செய்தார்.

எந்தவொரு விசாரணையும் இன்றி கைது செய்ய அனுமதிக்கும் உள்நாட்டுப் பாதுகாப்புச் சட்டத்தால் (Internal Security Act (Malaysia) ஜனநாயக செயல் கட்சியின் தலைவர்கள் அடிக்கடி அச்சுறுத்தப் பட்டாலும், அந்தக் கட்சியின் அரசியல் நிலைப்பாடு மிகவும் நிலையானது என்பதை உணர்ந்தார்.

டாமன்சாரா கிளைத் தலைவராக இருந்த மலேசிய அரசியல்வாதி டோனி புவா என்பவரால் ஈர்க்கப்பட்டு, ஜனநாயக செயல் கட்சியில் முழுநேரமாகச் சேவை செய்ய முடிவு செய்தார். டோனி புவாவின் அடிச் சுவடுகளைப் பின்பற்றி, 2008 பொதுத் தேர்தலுக்கு சற்று முன்பு, தன் வழக்கறிஞர் தொழிலைத் துறப்பு செய்தார்; முழு நேர அரசியல்வாதியாக மாறினார்.

மலேசியாவின் முதல் பெண் சபாநாயகர்

2008 பொதுத் தேர்தலில் சுபாங் ஜெயாவின் தொகுதிக்கு சிலாங்கூர் மாநில சட்டமன்ற உறுப்பினராகத் தேர்ந்தெடுக்கப் பட்டார். 2013 பொதுத் தேர்தலில், சுபாங் ஜெயா சட்டமன்ற உறுப்பினராக இரண்டாவது முறையாக மீண்டும் தேர்ந்தெடுக்கப் பட்டார்.

அவரின் மறுதேர்தலுக்குப் பிறகு, 21 ஜூன் 2013-இல், சிலாங்கூர் மாநிலச் சட்டமன்றத்தில், மலேசியாவின் முதல் பெண் சபாநாயகராகப் பதவியேற்றார். அப்போது அவருக்கு வயது 34. அத்துடன் மலேசியாவின் மிக இளைய சபாநாயகர் எனும் பெயரையும் பெற்றார்.

மலேசிய அமைச்சரவை பதவி

2018-ஆம் ஆண்டு மலேசியப் பொதுத் தேர்தலில், சிகாம்புட் மக்களவைத் தொகுதியில் போட்டியிட ஜனநாயக செயல் கட்சியால் தேர்ந்தெடுக்கப்பட்டார். அந்தத் தேர்தலில் அவர் வெற்றி அடைந்தார்.

தேர்தலுக்குப் பின்னர் பாக்காத்தான் அரப்பான் கூட்டணி, அரசாங்க நிர்வாகப் பொறுப்பை ஏற்றதும், புதிய மலேசிய அமைச்சரவையில் அன்னா இயோ; பெண்கள், குடும்பம் மற்றும் சமூக மேம்பாட்டுக்கான துணை அமைச்சராக (Deputy Minister of Women, Family, and Community Development) நியமிக்கப் பட்டார்.

தனிப்பட்ட வாழ்க்கை

அன்னா இயோவுக்கு 4 உடன்பிறப்புகள் உள்ளனர். இவர் ஒரு முன்னாள் வழக்கறிஞர். இவரின் கணவரின் பெயர் இராமச்சந்திரன் முனியாண்டி (Ramachandran Muniandy). இவருக்கு சாய் அதிரா ராம் (Shay Adora Ram) மற்றும் கயலி இமானி ராம் (Kayleigh Imani Ram) என இரண்டு மகள்கள் உள்ளனர்.

தேர்தல் முடிவுகள்

சிலாங்கூர் மாநில சட்டமன்றம்: N31 சுபாங் ஜெயா

ஆண்டு			வாக்குகள்	%	எதிரணி		வாக்குகள்	%	வாக்குப் பதிவுகள்	பெரும் பான்மை	மொத்த வாக்குகள்
2008		ஹன்னா இயோ (ஜசெக)	23,459	70.94%		ஓங் சோங் சுவான் (மசீச)	9,608	29.06%	33,067	13,851	79.31%
2013		ஹன்னா இயோ (ஜசெக)	40,366	'76.09%		கான் மெங் பூ (மசீச)	12,297	23.17%	53,052	28,069	86.20%

மலேசிய நாடாளுமன்றம்: P117 சிகாம்புட் மக்களவைத் தொகுதி, கோலாலம்பூர்

ஆண்டு			வாக்குகள்	%	எதிரணி		வாக்குகள்	%	வாக்குப் பதிவுகள்	பெரும் பான்மை	மொத்த வாக்குகள்
2018		ஹன்னா இயோ (DAP)	53,124	82.07%		லோக பால மோகன் (MyPPP)	7,422	11.47%	77,956	45,702	83.72%
						முகமட் சோலே அப்துல் ரசாக் (PAS)	4,181	6.46%
2022		ஹன்னா இயோ (DAP)	68,438	80.05%		பிரபாகரன் வைத்திலிங்கம் (GERAKAN)	8,754	10.24%	85,491	59,684	71.45%
						டேனியல் லிங் சியா சின் (MCA)	8,304	9.71%

மேலும் காண்க

• சிகாம்புட்
• மலேசியப் பொதுத் தேர்தல்
• மலேசியப் பொதுத் தேர்தல், 2022
• அன்வார் இப்ராகிம் அமைச்சரவை