பல ஆண்டுகளாக விக்கிப்பீடியா கட்டுரைகளைப் படித்தும் திருத்தியும் வந்திருக்கிறேன். பெயரிலியாகத் திருத்தியவை உண்டு. பெரும்பாலும் ஆங்கிலக் கட்டுரைகளில் பிழை திருத்தியிருக்கிறேன். 2009ம் ஆண்டிலிருந்து பதிவு செய்த பயனரானேன். உடல் நலக்குறைவால் படுக்கையில் இருக்க வேண்டிய நிலையில் சலிப்புத் தட்ட தற்செயலாக ஹாத்திக்கும்பா கல்வெட்டு பற்றிய ஒரு குறிப்பு முகநூலில் என் கண்ணில் பட்டது. தமிழில் விக்கிப்பீடியாவில் இது பற்றி என்ன சொல்கிறார்கள் என்று தேடியபோதுதான் அப்படி ஒரு கட்டுரை தமிழில் இல்லை எனத் தெரிந்தது. ஏதோ ஒரு தூண்டலில் உடனடியாக எழுதத் தொடங்கினேன். ஆங்கிலக் கட்டுரையிலிருந்து மொழி பெயர்த்தது மட்டுமின்றி மேலும் பல குறிப்புகளையும், தமிழர் வரலாற்றுக்கும் இந்தக் கல்வெட்டுக்கும் உள்ள தொடர்புகளைப் பற்றியும் எழுதத் தொடங்கினேன். தமிழ் விக்கிப்பீடியர்களும், முகநூல் நண்பர்களும் ஊக்கம் கொடுத்ததும் ஒரு காரணம். நோயிலிருந்து விடுபட இந்தத் தொகுப்பு ஒரு புத்துணர்ச்சியையும் கொடுத்தது. கட்டுரை பெற்ற வரவேற்பு இதைப் போன்ற பல கட்டுரைகளை எழுத வேண்டும் என்று தூண்டுகிறது.