சந்தி (நாடகம்)

சந்தி என்பது நாடகவியலில் நாடகத்தின் கதையைப் பிரித்து அமைக்கும் பிரிவு ஆகும்.இதனை அங்கம் எனவும் கூறுவர். பொதுவாக நாடகத்தின் கதையை ஐந்து சந்தியாகப் பிரிப்பர். இதனடிப்படையிலேயே ஓர் சந்தி அதாவது ஒரு பிரிவு மட்டுமே கொண்ட நாடகம் ஓரங்க நாடகம் எனப்பட்டது.

சந்தி வகைகள்

1. முகம்
2. பயிர்முகம்
3. கருப்பம்
4. விளைவு
5. துய்த்தல்

முகம்

உழுத நிலத்தில் விதைக்கப்பட்ட விதை முளையாகத் தோன்றுவது போல, நாடகக் கதையின் போக்கு அறியப்படுமாறு அமைப்பது முகம் எனப்படும் பிரிவாகும்.

பயிர்முகம்

முளைத்த நாற்று இலைவிடுவது போன்று நாடகத்தின் கதை வளர்வது பயிர்முகம் எனப்படும்.

கருப்பம்

வளர்ந்த பயிர் கருக்கொண்டு கதிர்விடுவது போல் நாடகக் கதையின் கருத்துத் தோன்றும்படி அமைப்பது கருப்பம் எனப்படும்.

விளைவு

கதிர் திரண்டு முற்றி மணியாகி அறுவடைக்கு ஆயத்தாமாகி இருப்பது போல நாடகப் பொருள் நன்கு விளங்க அமைப்பது.

துய்த்தல்

முற்றி விளைத்த கதிர்களை அறுவடை செய்து நெல்மணிகளைக் கொண்டு போய் உண்டு மகிழ்வது போல நாடகக் கதையின் முழுக்கருத்தும் தோன்ற அமைப்பது துய்த்தல் எனப்படும்.

இவ்வாறு ஐந்து சந்திகளாக நாடகத்தின் கதை அமைய வேண்டும் என நாடகத்தமிழ் இலக்கண நூல்கள் கூறுகின்றன.