அசுரா குரேசி
| அசுரா குரேசி Azra Quraishi | |
|---|---|
 1999 ஆம் ஆண்டில் அசுரா குரேசி | |
| பிறப்பு | 22 செப்டம்பர் 1945 டோங்க் இராச்சியம், இராசத்தான், இந்தியா |
| இறப்பு | 22 நவம்பர் 2002 (அகவை 57) இராவல்பிண்டி, பாக்கித்தான் |
| தேசியம் | பாக்கித்தானியர் |
| துறை | தாவரவியல் |
| கல்வி கற்ற இடங்கள் | பாரிசு சுத் பல்கலைக்கழகம், முனைவர் |
அசுரா குரேசி (Azra Quraishi) (22 செப்டம்பர் 1945-22 நவம்பர் 2002) பாக்கித்தான் நாட்டைச் சேர்ந்த முன்னணி தாவரவியலாளர் ஆவார். 1945 ஆம் ஆண்டு செப்டம்பர் மாதம் 22 ஆம் தேதி இவர் பிறந்தார். பாக்கித்தானில் உருளைக்கிழங்கு உற்பத்தியை மேம்படுத்துவதற்காகப் பணியாற்றினார். மேலும் திசு வளர்ப்பு குறித்த ஆராய்ச்சிப் பணிக்காக அறியப்பட்டார். 1997 ஆம் ஆண்டில் போர்லாக் விருது, 2002 ஆம் ஆண்டில் ஆர்ட்ரே டெசு பாம்சு அகாடமி விருதுகளும் இவருக்கு வழங்கப்பட்டன. பாக்கித்தானின் உருளைக்கிழங்கு உற்பத்தியை 5% அளவுக்கு உயர்த்திய பெருமை இவருக்கு உரியதாகும். [1]
ஆரம்பகால வாழ்க்கை மற்றும் கல்வி
[தொகு]1945 ஆம் ஆண்டில் இந்தியாவின் இராசத்தான் மாநிலத்தில் அப்துசு சத்தார் குரேசி, சல்மா குரேசி தம்பதியருக்கு மகளாக குரேசி பிறந்தார். ஆங்கிலேயர்கள் திட்டமிட்ட "இந்தியப் பிரிவினை நிகழ்வால் " ஏற்பட்ட எழுச்சியில் இவரது குடும்பம் பாக்கித்தானில் உள்ள ராவல்பிண்டிக்கு குடிபெயர்ந்தது. தனது சொந்த லாகூர் நகரத்தில் உள்ள கார்டன் கல்லூரியில் தனது முதல் பட்டத்தைப் பெற்றார். 1966 ஆம் ஆண்டில், லாகூரில் உள்ள பஞ்சாப் பல்கலைக்கழகத்தில் முதுகலைப் பட்டம் பெற்றார்.[2]
ராவல்பிண்டியில் உள்ள விகார்-உன்-நிசா பெண்கள் கல்லூரி பல ஆண்டுகள் விரிவுரையாளராகப் பணி செய்த பிறகு, குரேசி பாக்கித்தான் அரசாங்கத்தின் உதவித்தொகை கிடைக்கப்பெற்று வெளிநாடுகளுக்குச் சென்றார். இதன் விளைவாக, 1973 ஆம் ஆண்டில் சோலனம் டியூபரோசம் வர் பி.எப்-15 குறித்த திசு வளர்ப்பு ஆராய்ச்சிக்காக முதுகலைப் பட்டம் பெற்றார். மூன்று ஆண்டுகளுக்குள் இவர் பிரான்சு நாட்டின் ஓர்சேயில் உள்ள பாரிசு-சுத் பல்கலைக்கழகத்தில் இம்முனைவர் பட்டத்தைப் பெற்றார். இது "சோலனம் டியூபரோசம் வரில் உள்ள தளத்திலுள்ள தளிர்களின் ஆய்விலிருந்து குருத்தெலும்பு உருவாக்கமும் உறுப்பு உருவாக்கமும் பற்றிய ஆய்வாகும்.[2]
அறிவியல் தொழில்
[தொகு]அசுரா குரேசி பாக்கித்தானில் வைரசு இல்லாத விதை உருளைக்கிழங்கை உருவாக்கினார். பாக்கித்தான் நாட்டின் வருடாந்திர உருளைக்கிழங்கு உற்பத்தியை 5% அதிகரித்தார். நெதர்லாந்தில் இருந்து விதை உருளைக்கிழங்கை இறக்குமதி செய்ய வேண்டிய அவசியத்தை குறைத்ததால் இந்த ஆராய்ச்சி அவரது நாட்டின் வர்த்தக நிலையை பாதித்தது. இந்த பங்களிப்பு இவருக்கு தேசிய அங்கீகாரத்தையும் அளித்தது. அசுரா குரேசி "வாழைப்பழம், பேரீச்சம்பழம் ஆகியவற்றின் நுண் பரப்புதல் மற்றும் உள்ளூர் கோதுமை மற்றும் அரிசி சாகுபடியில் திசு வளர்ப்பு மூலம் உப்பு சகிப்புத்தன்மையை திரையிடும் திட்டங்களையும் வெற்றிகரமாக தொடங்கினார்". 140 எண்ணிக்கைக்கும் மேற்பட்ட ஆராய்ச்சிக் கட்டுரைகளையும் இவர் எழுதியுள்ளார்.[3][2][1]
விருதுகளும் அங்கீகாரமும்
[தொகு]இவரது பங்களிப்புகள் பல விருதுகளை இவருக்குப் பெற்றுத்தந்தன.
- அம்தார்து பாக்கித்தான் விருது 1992 [2]
- கள ஆராய்ச்சி மற்றும் பயன்பாட்டிற்கான நார்மன் போர்லாக் விருது 1997 [1]
- பாக்கித்தான் வேளாண் ஆராய்ச்சி கவுன்சிலின் 2001 ஆம் ஆண்டிற்கான சிறந்த விஞ்ஞானிக்கான மில்லினியம் விருது [2]
- 2002 இல் பிரான்சின் ஆர்டர் டெசு பாம்சு அகாடமி விருது [2]
நவம்பர் 26,2002 ஆம் ஆண்டு நவம்பர் மாதம் 26 ஆம் தேதியன்று இசுலாமாபாத்தில் நடந்த ஒரு நினைவு விழாவில், பாக்கித்தான் விவசாய ஆராய்ச்சி கவுன்சிலின் தலைவரான பத்ருதீன் சூம்ரோ, விவசாய உயிரி தொழில்நுட்பம் மற்றும் மரபியல் ஆராய்ச்சி நிறுவனம் குரேசியின் நினைவாக மறுபெயரிடப்படும் என்று அறிவித்தார். கண்ணாடி உச்சவரம்பு குரேசியை அவர் தகுதியான பதவி உயர்விலிருந்து தடுத்ததாக சூம்ரோ ஒப்புக் கொண்டார். பாக்கித்தான் வேளாண் ஆராய்ச்சி கவுன்சிலின் வேளாண் உயிரி தொழில்நுட்ப நிறுவனத்தின் தலைமை அறிவியல் அதிகாரி மற்றும் துணை பொது இயக்குநராக இவர் பதவி உயர்வு பெற்றார். குரேசிக்கு குழந்தைகள் இல்லை, ஆனால் அவர் தனது மருமகனுக்கும் பல ஏழை குழந்தைகளின் நிதி செலவுகளுக்கும் பங்களித்தார்.[2]
பாக்கித்தான் தாவரவியல் சங்கம் உட்பட பல சங்கங்களில் அசுரா குரேசி உறுப்பினராக இருந்தார்.[2]
வெளியீடுகள்
[தொகு]பன்னாட்டு அளவில் அங்கீகரிக்கப்பட்ட அறிவியல் இதழ்களில் 140 எண்ணிக்கைக்கும் மேற்பட்ட அறிவியல் ஆராய்ச்சி கட்டுரைகளையும் 85 பிரபலமான அறிவியல் கட்டுரைகளையும் குரேசி வெளியிட்டார். பாக்கித்தான், இந்தியா, கனடா, எகிப்து, பிலிப்பைன்சு, அமெரிக்கா, இங்கிலாந்து, இயோர்டான், வங்காளதேசம் மற்றும் இறப்பதற்கு ஒரு மாதத்திற்கு முன்பு சீனாவிலுமாக 70 எண்ணிக்கைக்கும் மேற்பட்ட தேசிய மற்றும் பன்னாட்டு மாநாடுகளிலும் கருத்தரங்குகளிலும் குரேசி பங்கேற்றார்.[2]
மரணம்.
[தொகு]அசுரா குரேசி 2002 ஆம் ஆண்டு நவம்பர் மாதம் 22 ஆம் தேதியன்று தனது 57 ஆவது வயதில் இறந்தார்.[2]
மேற்கோள்கள்
[தொகு]- ↑ 1.0 1.1 1.2 "Norman Borlaug Award for Dr. Azra Quraishi (includes her profile also)". PARC News (Pakistan Agricultural Research Council) 19 (10). October 1999. http://www.parc.gov.pk/index.php/en/borluag-awards/124-borluag/468-norman-borlaug-award-for-dr-azra-quraishi. பார்த்த நாள்: 20 March 2020.
- ↑ 2.00 2.01 2.02 2.03 2.04 2.05 2.06 2.07 2.08 2.09 Zafar, Yusuf; Ghaffar, Abdul (2003). "Obituary - DR. AZRA QURAISHI (1945-2002)". Pakistan Journal of Botany 35 (1): 1–2. http://www.pakbs.org/pjbot/abstracts/35(1)/01.html. பார்த்த நாள்: 20 March 2020.
- ↑ Quraishi, Azra. "Sustained Multiplication of Long Term Embryogenic Cultures of Date Palm and Their Field Performance". Pakistan Journal of Botany 29 (1): 135–141.
| பன்னாட்டு | |
|---|---|
| தேசிய | |
